16 февраль куни бўлиб ўтган «Шўртан» - «Динамо» ўртоқлик учрашувида клубимиз сафига яқинда келиб қўшилган Музаффар Умрзоқов жароҳат олганди. Ўшанда Музаффар баҳсни асосий таркибда бошлаган, бироқ жароҳат олиши натижасида ўрнини Александр Востриковга бўшатиб берганди.

Кейинчалик футболчи компьютер томографияси текширувидан ўтди ва ҳозир жароҳатини даволаш билан банд. Ярим ҳимоячининг қачон сафга қайтишини билиш мақсадида клуб шифокори Алишер Абдураҳмоновга муражаат қилдик.

- Компьютер текширувидан сўнг Умрзоқовнинг тизза бўғинларидан жароҳат олгани маълум бўлди, - дейди Алишер ака. – Энди у жароҳати туфайли биринчи тур учрашувини ўтказиб юборишга мажбур. Агар ҳаммаси жойида бўлса, Музаффар олий лиганинг иккинчи турида умумжамоа сафига қайтади.

Эслатиб ўтамиз, «Шўртан» олий лиганинг иккинчи тур баҳсини 8 март куни Ғузорда «Пахтакор»га қарши ўтказади. Ўйлаймизки, шу ўйингача Музаффар буткул соғайиб майдонга тушишга тайёр бўлади.