"Реал Мадрид" дарвозабони Кепа Аррисабалага жамоадаги ҳолатидан кўнгли тўлмаяпти.
Мадридликлар ўтган ёзда асосий дарвозабони Тибо Куртуа жароҳат олгани сабаб 29 ёшли испаниялик футболчини "Челси"дан ижарага олган эди. Ўтишдан кўп ўтмай, дарвозабон асосий таркибдаги ўрнини Андрей Лунинга бой бериб қўйди.
The Athletic хабарига кўра, Кепа "Реал" бош мураббийи Карло Анчелотти ҳозирда жамоанинг биринчи рақамли футболчиси ким эканлигини тушунтирмаганидан норози.
Дарвозабоннинг ижара шартномаси 2023/24 йилги мавсум охиригача амал қилади. У “Реал” сафида 18 та ўйин ўтказиб, 18 та гол ўтказиб юборди ва 7 та ўйинда дарвозаси дахлсизлигини сақлаб қолди.
