Бразилиянинг «Сантос» клуби ҳужумчиси Неймар келажаги борасида қатъий қарор қабул қилди. Бу ҳақда маҳаллий матбуотга таяниб «Чемпионат.соm» нашри хабар тарқатмоқда. Бу хабарни футболчига яқин бўлган кишилардан бири маълум қилган.

Унинг таъкидлашича, Неймар «Барселона»га ўтишга қарор қилиб бўлган. Бироқ  футболчига «Бавария» ва «Манчестер Сити» қизиқишда давом этмоқда. Инглизлар футболчи учун кўпроқ маош тўлашга рози бўлиб туришибди, бироқ Неймарнинг даромади шундоқ ҳам йилига 20 миллион евродан ошгани сабаб, у молиявий шартларга кўп эътибор қаратишни истамаяпти.

«Дарҳақиқат «Манчестер Сити» Неймарнинг хизматлари билан қизиқмоқда. Улар Неймар учун самолёт тўла пул беришга ҳам тайёр. Аммо, Неймарнинг қарорида пул ҳал қилувчи аҳамият касб этмайди», дейди футболчининг яқинларидан бири.