Ўтган йили «Локомотив» жамоаси ўз тарихидаги бир қатор рекордларни янгилаб, мухлисларини хушнуд этганди. Буни қарангки, темирйўлчилар бу йил ҳам рекордлар сериясини давом эттиришга бел боғлаган кўринишади.

1-турда «Локомотив» ўз майдонида «Бухоро»ни йирик – 5:1 ҳисобида мағлуб этди. Шу кунгача жамоа мавсумнинг очилиш ўйинида бундай сермаҳсул ўйин натижа қайд этишмаганди. Ортда қолган йиллар статистикасига эътибор қаратсак, «Локомотив» 2004 йили 1-турдаёқ шундай йирик ғалабага эришганини кўриш мумкин. Ўшанда темирйўлчилар Самарқанднинг «Динамо» клубини 4:0 ҳисоби билан доғда қолдиришган. Бу сафар тўплар фарқи борасидаги кўрсаткич ўша-ўша (4 тўп) ҳолатда қолган бўлса-да, аммо сермаҳсуллик борасида ўсишга эришилди. Яъни, мавсумнинг илк ўйинида «Локомотив» рақиби дарвозасини 5 марта ишғол қила олди.