Мадриднинг “Реал” клуби ярим ҳимоячиси ва Испания терма жамоасининг собиқ футболчиси Браим Диас Марокаш терма жамоасида 10-рақамли либосда майдонга тушади. Бу ҳақда Diario AS нашри хабар берди.
Олдинроқ "Реал"нинг ҳужумкор ярим ҳимоячиси Марокаш терма жамоасида ўйнашини маълум қилганди. Диас 2021 йилнинг июн ойида Испания терма жамоаси сафида битта ўйин ўтказган. Ўшанда "қизил фурия" Литва терма жамоасини 4:0 ҳисобида мағлуб этди. Эслатиб ўтамиз, Диас Испанияда туғилган, аммо унинг ота-онаси марокашлик.
Браим жорий мавсумда "Реал" сафида барча мусобақаларда 33 та ўйинда майдонга тушди. Ярим ҳимоячи 9 та гол урди ва 4 та голли узатмани амалга оширди.
