Украина терма жамоаси ва Лондоннинг “Арсенал” клуби футболчиси Александр Зинченко Евро-2024 плей-офф босқичида Босния ва Герцеговина билан бўладиган ўйиндан олдинги умидлари билан ўртоқлашди ва ушбу учрашувда ғалаба қозониш учун нима қилиш кераклигини айтди.
"Биз Босния терма жамоасининг савиясига қарашимиз шарт эмас, биз имкон қадар яхши тайёргарлик кўришимиз ва энг яхши ўйинимизни кўрсатишимиз керак. Агар биз ўзимизга эътибор қаратсак, кўп нарсага эришишимиз мумкин.
Биз рақибга эътибор беришимиз керак, аммо мақсадимиз яхшироқ тайёргарлик кўриш", - дея Зинченконинг сўзларини келтиради УАФ матбуот хизмати.
Эслатиб ўтамиз, Украина ва Босния терма жамоалари ўртасидаги учрашув 21 март куни бўлиб ўтади. Ғолиб Исландия-Исроил жуфтлиги ғолибига қарши ўйнайди.
Плей-офф турнири доирасида 21-март куни олтита ярим финал, 26-март куни эса учта финал ўйинлари бўлиб ўтади.
Финал босқичининг учта ғолиби Германияда бўлиб ўтадиган Европа чемпионатида иштирок этади.
