"Интер" клубининг арманистонлик ярим ҳимоячиси Генрих Мхитарян профессионал футболчилик фаолиятини якунлаганидан кейин ҳам футболда қолиши даргумон эканлигини айтди. Айни пайтда Мхитарян 35 ёшда.

"Мен бу ҳақда кўп ўйлайман, лекин тўғрисини айтсам, футболда қолишим даргумон. Балки мен бошқа нимадир қиламан, ҳаётда ҳар доим ўрганиш керак бўлган нарса бор. Биринчидан, мен оилам ва дўстларим билан кўпроқ вақт ўтказишни ва янги нарсаларни ўрганишни хоҳлайман. Масалан, пиширишни ўрганишни. Айтайлик, мен овқат пишира оламан, лекин унчалик яхши эмас. Мураббийлик фаолияти? Йўқ. Футболчи сифатида аллақачон кўп вақтимни спорт залида ва машғулот майдонларида ўтказяпман. Мураббий эса бундан ташқари, рақибни ўрганиши, таҳлиллар ўтказиши, маълумотлар тўплаши ва ҳоказоларни ҳам бажариши керак", - деди Мхитарян "Интер"нинг расмий сайтига.