"Олмалиқ" ва "Қизилқум" жамоалари ўртасидаги баҳсдан кейин жамоалар бош мураббийлари ўз фикрлари билан ўртоқлашишди.

Игорь Шквирин, «Олмалиқ» бош мураббийи:
«Об-ҳаво сабаб, бу турнинг кўп ўйинлари қолдирилди. Бизда майдонни ўйинга шай ҳолатга келтириш ишлари олиб борилди. Бугун имкон қадар майдонни тайёрлаган барчага раҳмат. Умуман олганда қор ёғмаганда ҳам биз қумли майдонда ўйнашга мажбур бўлардик. Тўғриси тушуна олмаяпман. Нега Қаршида майдон кўм-кўк, иқлими улардан қулай Олмалиқда ўт ўстириш имкони йўқ. Ёки бу ерда ёмғирнинг унуми йўқми? Жамоа ўйини турдан-турга кучайиб боради. Бу йил ўзакни сақлаб қолган ҳолда тўп билан муоамала борасида тажрибали футболчиларни таркибга қўшдик.

Аввалги йилларда сўнгги дақиқаларда гол уриб керакли натижаларга эришардик. Ҳозир эса аксинча бўляпти. Сўнгги дақиқаларда бўш ўйин намойиш этиш сабабларини аниқлаш лозим. Диёр Туропов ҳар томонлама ўзини кўрсата олмоқда. Шу сабабли ёш бўлсада унга ишонч билдиряпмиз. Исроил Эргашев ҳозирги ҳолатида тайёр эмас».