Каталониянинг “Барселона” клуби ҳужумчиси Жоау Феликс жамоасини Англия Премьер-лигасидан ярим ҳимоячи сотиб олишга чақирди. "Атлетико Мадрид"дан ижарага олинган форвард "Манчестер Сити"да ўйнаётган Бернарду Силвани назарда тутган.
"Клуб Бернарду Силва билан шартнома имзолаши керак. У жуда яхши ўйинчи ва шахс сифатида ундан ҳам яхшироқ. Бернарду мендан тез-тез "Барселона" ҳақида сўрайди, бу ерда унинг оиласи бор. Мен унга бу ерда ҳаммаси яхши эканини айтдим", - дея Феликснинг сўзларини келтиради журналист Жерар Ромеро.
Жоау Португалия терма жамоасида Силва билан бирга ўйнайди. Бернардунинг шартномасида товон пули 50 миллион евро қилиб белгиланган. Ярим ҳимоячига "Барселона" анчадан бери қизиқиш билдирмоқда.
