Тошкентда дув-дув гап. «Бунёдкор» стадионида 26 март куни ўтказиладиган ўйин эл оғзида. Бир томондан Ўзбекистон ва Ливан ўртасидаги ўйин омманинг хаёлини ўғирлаган бўлса, иккинчи томондан мана шу муҳим ўйиннинг янги стадионда ўтказилиши бутун Республика бўйлаб муҳокама қилинаяпти.
Шунга ўхшаш ҳолат стадионнинг очилиш маросими арафасида бўлганди. Унда саволлар ҳозиргига қараганда кўп эди. Жавоби ҳам мавҳум эди. Зеро, стадион янги, унинг ичини, харитасини саноқли одамларгина кўрган эди.
Бугун эса уйда ўтириб ҳам «Бунёдкор» стадионига бориш мумкин. Интернет керак. Стадион маъмуриятининг расмий сайти ишга тушди ва арена билан боғлиқ ҳамма саволлар шу ерда бор.
Сайтнинг борлиги шундоқ ҳам бошқа мавзудаги саволлар тахланиб қолган бир вақтда, стадион харитаси, у ерга қандай кириш, ейиш ёки ичиш учун нималар олиб кириш мумкинлиги ва шунга ўхшаш бошқа саволларга ишқибозларнинг ўзи жавоб топишига имкон беради. Стадион бўйлаб 3D форматида сайр қилиш ҳам мумкин. Хоҳланг матбуот марказига, хоҳланг ресторан ёки барга, стадион музейига киринг. Чипта ҳам керакмас. Ҳеч ким «қаерга кетаяпсан» демайди.
Фақат яхшилаб титкиласангиз бўлди.
Стадион сайти: http://bunyodkor-stadium.uz/
3 D cайр: http://bunyodkor-stadium.uz/3d_tour
