Осиё ўйинларининг футбол бўйича 3-ўрин учун учрашувида Ўзбекистон U-23 терма жамоаси Хитойга пенальтилар сериясида имкониятни бой берди.

Баҳснинг 15-дақиқасида Ху Хэтао Хитойни олдинга олиб чиқди — 1:0. Биринчи бўлим якунига яқин, 43-дақиқада Сардорбек Баҳромов ҳисобни тенглаштирди — 1:1.

Иккинчи бўлимда, 53-дақиқада Ван Юйдун Хитойни яна ҳисобда олдинга олиб чиқди. Ўзбекистон эса сўнгги дақиқаларга қадар курашди ва 90-дақиқада захирадан майдонга тушган Шодиёр Шодибоев гол уриб, ҳисобни 2:2 кўринишига келтирди.

Асосий вақт шу ҳисобда якунланди ва бронза медали тақдири пенальтилар сериясида ҳал қилинди.

11 метрлик зарбаларда Хитой 4:3 ҳисобида устун келди. Ўзбекистон сафида Муҳаммадали Реимов ва Шодиёр Шодибоев ўз зарбаларидан фойдалана олмади.

Шу тариқа, Ўзбекистон U-23 терма жамоаси Aichi-Nagoya–2026 Осиё ўйинларини 4-ўринда якунлади.

Осиё ўйинлари. 3-ўрин учун баҳс

Хитой — Ўзбекистон — 2:2 (пенальтилар — 4:3)

Голлар: Ху Хэтао, 15 — 1:0; Сардорбек Баҳромов, 43 — 1:1; Ван Юйдун, 53 — 2:1; Шодиёр Шодибоев, 90 — 2:2.