"Ноттингем Форест" бош мураббийи Нуну Эшпириту Санту "Тоттенхэм"да қисқа муддат ишлагани ҳақидаги саволга жавоб берди.

Португалиялик мураббий 2021 йилнинг июлида “шпорлар”ни қабул қилган ва тўрт ойдан сўнг истеъфога чиқарилганди. Бугун мутахассис ўша вақтлардан бери илк бор "Тоттенхэм" стадионига қайтди, аммо "қасос" ололмади - "Ноттингем Форест" 1:3 ҳисобида мағлуб бўлди.

"Мен учун бу фақат оддий ўйинлардан бири. "Тоттенхэм"да ишлаш мен учун бахт ва шараф эди. Ишлар унчалик яхши чиқмади ва охири ҳам яхши бўлмади, лекин мен ўз йўлимдан, “Тоттенхэм” эса ўз йўлидан боришда давом этмоқда. Илгари ишлаган жойингизга ташриф буюриш ҳар доим ёқимли, аммо бу менинг ҳозирги жамоамга эътибор қаратишимга халақит бермади”, деди Эшпириту Санту ўйиндан кейинги интервьюсида.