Ўтган ёзда Харри Кейн "Бавария" сафига қўшилган эди. Англиялик ҳужумчи Мюнхенга ўз фаолиятида ҳеч қачон ютмаган совринларни кўзлаган ҳолда йўл олди.
Кейн “Бавария” сафидаги илк ўйинидаёқ фаолиятидаги илк совринни қўлга киритиши мумкин эди, аммо август ойида мюнхенликлар Суперкубок учун баҳсда “РБ Лейпциг”га 0:3 ҳисобида имкониятни бой беришди. Кейинчалик "Бавария" Германия кубогидан чиқиб кетди ва энди Мюнхен клуби 2012 йилдан бери биринчи марта Бундеслига чемпионлигини қўлга кирита олмади.
Натижада Кейн билан биринчи мавсумда "Бавария" ички турнирларда барча совринлардан маҳрум бўлди. Жамоада ҳозирда фақат Чемпионлар лигасида ғалаба қозониш имконияти бор. 17 апрель, чоршанба куни Томас Тухель шогирдлари чорак финал жавоб учрашувини “Арсенал”га қарши ўтказади. Лондондаги биринчи учрашув 2:2 ҳисобида дуранг билан якунланди.
