Эртага U19 чемпионатида 2-тур беллашувлари бўлиб ўтади. Лига ўтган тўрт йиллик натижаларини таҳлил қилишда давом этади.

Ўтган ҳафта U19 чемпионатининг дастлабки тўрт мавсуми якунига кўра турнир жадваллари эълон қилинганди. Ҳозирча Насаф, Нефтчи, Навбаҳор ва Металлург жамоалари мазкур мусобақада бир марта ғолиб чиқишнинг уддасидан чиқа олган. Бирор жамоа кетма-кет тўрт мавсум давомида совриндорлар қаторида бўлиш насиб қилмаган.

U19 чемпионатида натижа муҳим ҳисобланмайди. U19 жамоаси U21 жамоаси учун кўприк вазифасини ўтаб беради. Агар футболчи Аббос Файзуллаев каби ўта иқтидорли бўлса, U19 жамоасини четлаб ўтиб, дарҳол асосий таркиб машғулотларига ҳам қўшилиши мумкин.

Сўнгги тўрт йилликнинг умумий натижасига кўра Навбаҳор U19 устунлик қилмоқда. Наманганлик ёшлар мусобақада ҳозирга қадар 51 та учрашувда зафар қучишнинг уддасидан чиқа олган ва умумий ҳисобда 165 очко жамғаришга эришган. Пахтакор 162 очкога эга, Насаф эса 157 очко билан кучли учликни якунлаган.

Нефтчи мана шу етакчилар каби тўрт эмас, 3 та мусобақада иштирок этган. Сабаби мусобақа ўзининг илк мавсумида фақатгина Суперлига ёшларини жамлаганди. 2021 йилдан эътиборан Пролига жамоалари ҳам унда иштирок этишни бошлаган. Шунга қарамай, Нефтчи умумий ҳисобда 6-ўринда бормоқда. Фарғоналик ёшлар дебют мавсумдаёқ олтин медалларга эга чиққанди.

Энг кўп гол уриш борасида ҳам тўрт йиллик сарҳисобига кўра наманганлик ёшлар пешқадам. Насаф эса нисбатан камроқ тўп ўтказиб юборгани билан мақтаниши мумкин.