Серхио Рамос 2023/2024 йилги мавсум якунида "Севилья"ни тарк этиши мумкин. Хабарга кўра, 38 ёшли футболчи клуб раҳбарлари билан янги шартноманинг молиявий шартлари бўйича келиша олмаяпти.
Агар томонлар муроса топа олмаса, Серхио жамоани эркин агент сифатида тарк этади. Рамосда фаолиятини МЛСда давом эттириш имкониятлари бор.
Испаниялик футболчига икки клуб қизиқиш билдирмоқда: "Интер Майами" ва "Лос-Анжелес Гэлакси".
Испания чемпионатининг жорий мавсумида Рамос 22 та ўйин ўтказиб, 3 та гол урди, 6 та сариқ карточка олди ва бир марта майдондан четлатилди.
