Мадриднинг “Реал” клуби бош мураббийи Карло Анчелотти ярим ҳимоячи Жуд Беллингемнинг Испания чемпионатининг энг яхши тўпурари учун кураши ҳақида фикр билдирди.
"Биз бу нарсалардан хавотир олмаймиз, Жуд аллақачон мавсумдаги мақсадларига эришган. Биз учун энг муҳими у ажойиб мавсум ўтказди", - дея Анчелотти сўзларини келтиради Madrid Zone.
Жорий мавсумда Беллингем Испания чемпионатининг 26 та учрашувида қатнашиб, 18 та гол урди ва 4 та голли узатмани амалга оширди.
Снайперлар пойгаси пешқадами "Жирона" ҳужумчиси Артем Довбик бўлиб, у Ла Лиганинг 33 ўйинида 20 та гол урган. Айтиш жоизки, мавсум якунланишига атиги уч тур қолди.
