Эртанги ўйинни аҳамияти тўғрисида гапиришни ҳожати йўқ. Ишда, ўқишда, йўлда, гапда қаерга борманг Ўзбекистон-Ливан бош мавзуга айланган. Юртимизда яшовчи футболдан хабардор инсон борки, ҳамма ҳаяжонда. Ғалаба бизга ҳар доимгидан қўпроқ керак. Шунинг учун барча ўйингача бўлган дилхираликлар (чипта можароси, БАА, Гонгконг)нинг  барчасини бир чеккага сурган ҳолда бор эътиборни МТЖни қўллаб-қувватлашга қараташимиз лозим. Ҳаммамиз эртанги ҳаёт-мамот жангида ғалаба учун «бир мушт»га айланишимиз шарт. Ғалаба учун нимаики қўлингиздан келса, барчасини қилинг.

Ўйинни стадионда томоша қиладиган мухлислар - ўйингоҳни ларзага келтиринг. Стадиондаги муҳитни кўриб араб футболчиларини оёқлари қалтирасин, биздаги руҳни, биздаги шиддатни кўриб, Тошкентдан очко билан кетишнинг имкони йўқлигини ўйин бошланмасданоқ ҳис этишсин. Олқишларингиз футболчиларимизга ишонч баҳш этсин. Бир зум тўхтаманг. Жисмоний имкониятингизни максимум даражасида қўллаб–қувватланг.

Юртимизнинг узоқ–яқин, шаҳар ва қишлоқларида яшовчи, бир ҳафтадан бери фикру хаёли эртанги ўйин бўлиб қолган юртдошлар! Турли сабаб билан дунёнинг турли бурчакларида яшаб, ўйинолди ҳаяжонидан уйқулари қочиб кетаётган ватандошлар! Барчамизнинг хоҳиш-истагимиз, орзу-мақсадимиз бир, бизга ғалаба керак, бизга ЖЧ финал йўлланмаси керак. Қўлингизни очиб дуо қилинг, эртага бахтсиз тасодифлар, омадсизликлар бизни четлаб ўтсин. Ўйиндан кейин бир-биримизни ғалаба билан табриклаб, байрам қилиш насиб этсин.

Сервер, Одил, Игнат, Жасур, Санжар, Саша, Улуғбек, Тимур, Азизбек, Анзур, Артём, Акмал, Виталий, Фозил, Шоҳрух, Камол, Фарҳод - қадрдонларим! Сизларга  ишонамиз. Эртага бутун фаолиятингиз давомидаги энг зўр ўйинингизни намойиш этасиз. Муҳташам «Бунёдкор» стадионидаги фантастик муҳит сизга куч ва ғурур бахш этсин. Майдон узра парвоз қилинг, ўйиндан завқ олинг. Халқимизга олам-олам қувонч улашиб, роҳат қилинг. Сизлар тарих ёзиш арафасидасиз.

Олға Ўзбекистон!

Биз бир жамоамиз Ливанни биргалашиб ютамиз.

Дилшодбек Нурматов