Таиланднинг Бангкок шаҳрида Марказий Осиё футбол ассоциациясининг 9-Конгресси ўтказилди. Унда Ўзбекистон футбол ассоциацияси биринчи вице-президенти, CAFA ҳакамлар қўмитаси раиси Равшан Ирматов ҳам иштирок этишди.

Конгресс аввалида CAFAга аъзо давлатларнинг қўшничилик ва ҳамкорлик муносабатлари янги босқичга чиқаётгани алоҳида таъкидланди. Минтақада футбол ривожланиб бораётгани, бу борада барча аъзо мамлакатлар катта саъй-ҳаракатларни амалга ошираётгани қайд этилди.

Конгрессда асосий эътибор ўтган йилги ишлар сарҳисоби ва кейинги режалар муҳокамасига қаратилди. Тақвимга кўра йил давомида CAFA шиори остида ўтган мусобақалар таҳлил қилинди. Ўтган йили илк маротаба миллий терма жамоалар иштирокида ўтган "CAFA Nationʼs Cup" мусобақаси ўтказилганлиги, келгусида барча терма жамоалар иштирокида тизимли равишда мусобақалар ўтказиш таклифлар илгари сурилди.

Шунингдек, аъзо ассоциацияларнинг бир қатор таклифлари ўрганиб чиқилди. Минтақада ҳакамликни ривожлантириш, янги босқичга олиб чиқиш ва мусобақаларда замонавий технологияларни жорий этиш борасида фикр алмашилди. Доимий равишда амалий ва назарий курслар ташкил этиш, ВАР тизими кўникмаларини эгаллаш бўйича машғулотлар, ФИФА ва ОФК дастурлари асосда ўқув-йиғинлар ўтказиш, мунтазам онлайн семинарлар ташкил этиш бўйича келишиб олинди.