Қатарда ўтказилган охирги Осиё кубоги арафасида Япония миллий жамоаси ФИФА рейтингида қитъа етакчиси эди.
Чунончи, айнан шу араб мамлакати мезбонлик қилган ЖЧ-2022да Испания ва Германия термалари устидан қозонилган унутилмас ғалабалар билан эътиборни тортган «кўк самурайлар» 2023 йилнинг июнь ойидан ОК-2023 гуруҳ босқичи 1-турига қадар нақ 11та ўйинни ўз фойдаларига ҳал қилишди - қойилмақом ғолибона юриш. Яна бир томони, японлар шу серия давомида рақиблар дарвозасига 49та гол (!) уришди. Бироқ қитъа чемпионатининг иккинчи ўйини Хажиме Мориясу жамоаси учун ҳақиқий огоҳлантирувчи қўнғироқ бўлди. Эсласангиз, «кунчиқар юрт» вакиллари Ироқ термасига қарши баҳсда мағлубиятни тан олишганди. Эрон термаси билан бўлган чорак финал ўйинининг 90+7-дақиқаси эса бутун Японияни батамом нокаутга учратди. Ҳар икки йирик турнирда бирдек яхши таассурот қолдирган ярим ҳимоячи Рицу Доан яқинда ФИФА расмий сайтига берган интервьюсида айнан Осиё кубоги сабоқларига тўхталди. Германия Бундеслигаси вакили - «Фрайбург»-нинг 25 ёшли футболчиси яна Қатар-2022 воқеликларини ёдга олди, ЖЧ-2026га қаратилган умидлари ва Олимпиада тажрибасига ҳам тўхталди.
- Рицу, жорий мавсумни «Фрайбург» клуби ва Япония термаси, қолаверса, ўзингиз учун қандай тасвирлаган бўлардингиз?
- Клубимиз ўтган мавумга нисбатан ўсишга эришмади натижа нуқтаи назаридан. Терма жамоамиз эса Осиё кубогидан эрта чиқиб кетди. Шундай экан, мавсумга ижобий баҳо беришим қийин. Жумладан, шахсий кўрсаткичлар томонидан ҳам. Шунинг баробарида ҳозир ўзимни ҳам руҳан, ҳам жисмонан кучлироқ ҳис қиляпман. Ҳа, шахсий статистикам бу фикрга мос келмаслиги мумкин, лекин тобора ривожланаётганимни қалбан сезиб турибман. Муҳими, мураббий салоҳиятимга шунчалик ишондики, ЕЛ ва ички турнирларда бирдек мунтазам майдонга туширди. Еврофутболда ҳафтасига 2та тўлиқ ўйин - бу янада шаклланиш учун ажойиб имконият.
- Япония миллий жамоасининг ОК-2023дан кейинги илк ўйини март ойида ЖЧ-2026 саралаш турнири ҳисобидан КХДР термасига қарши кечди. Қизиқ, ўша учрашувга қандай ҳолатда етиб боргандингиз?
- Қайси рақиб билан ўйнашимиздан қатъий назар, Осиё кубогидаги муваффақиятсизликни ортга суриб, ҳаммасини яна тўғри ташкил этиш, равон йўлга қайтишимиз зарурлигини теран тушуниб тургандик. Шахсан мен Осиё кубогида кузатилган омадсизликни дейлик, ЖЧ-2022дан чиқиб кетганимиздан кўра, кўпроқ ўйладим. Умуман, Эрон термасидан қабул қилинган мағлубият кўпчилигимиз учун ҳам ҳаёт, ҳам фаолиятимизда бурилиш нуқтасига айланди. Ҳар ҳолда, мен ўша мағлубиятда ижобий томонлари ҳам борлиги пайқадим. Тўғри, КХДР термасини атиги 1:0 ҳисобида енгганимиз кўпчиликни ўйлантириб қўйгандир. Аммо факт шуки, аксарият йигитлар ўша 5 кунлик йиғинни терма жамоа билан янги даврга қадам ташлаш вақти сифатида қабул қилишди.
- ЖЧ-2022 гуруҳ босқичида 2та ҳал қилувчи голга муаллифлик қилдингиз ва шу аснода футбол оламига овоза бўлдингиз. Ўзингиз учун илк мундиал қандай таассуротлар қолдирди?
- Жаҳон чемпионатида ўйнаш - бу болалик орзуларимдан бирининг рўёби. Барчаси ортида машаққатли меҳнат ётибди, албатта. Хусусан, оиламиз аъзолари, мураббийларим ва мухлисларнинг қўллаб-қувватлашлари туфайли ҳамиша олға юрдим. Миллий жамоа либосида бутун мамлакат фуқароларига қувонч улашиш учун ҳаракат қилиш - бу ҳам ёқимли, ҳам унутилмас жараён.
- Охирги 2та йирик турнирни олсак, сизларга Осиё кубогидаги натижа алам уйғотгани ўз-ўзидан тушунарли. Бу борадаги хулосангиз қандай?
- Ҳа, жаҳон чемпионати давомида, хусусан, Хорватия термаси бизни четга чиқарганида ҳам, ўзимизни тетик тутгандик. Чунки тўғри йўлдан бораётганимиз кўринган эди. Қисқаси, танланган стратегия иш бераётганини кўрдик ва келажакка оптимистик руҳда қарадик. Шу тариқа Осиё кубогига фақат ғалаба илинжида киришдик, мухлислар ҳам биздан фақат чемпионлик кутишди. Бироқ катта ишончни оқлай олмадик. Эҳтимол, бутун мамлакат фақат ғалаба кутгани босим юклагандир. Ҳар ҳолда, қитъа биринчилигида ҳар бир ўйинга ғалаба қозонишимиз шартлигини ўйлаган ҳолда тушдик. Қитъа кубогининг жаҳон чемпионатидан асосий фарқи шу, менимча.
- Энди олдинга қараймиз: ЖЧ-2026дан нималарни кутяпсиз?
- ЖЧ-2022 ва ОК-2023 воқеаларидан кейин миллий жамоада ўйнаш иштиёқим янада кучайгани аниқ. Бутун жамоамизга охирги муваффақиятсизлик ҳанузгача тинчлик бераётгани йўқ. Тинчланиш учун эса ЖЧ-2026га йўл олишимиз ва миллионлаб юртдошларимиз ишончини оқлашимиз керак. Ҳозирда Япония термаси таркиби ажойиб авлод вакилларидан тузилган. Барчамиз мамлакатимиз футболи учун мислсиз натижа тақдим этишни хоҳлаймиз.
- Навбатдаги мундиалда илк марта 48та жамоа иштирок этади. Ушбу кенгайиш яхшими ёки...?
- Энди чорак финалга чиқиш учун аввалгидан 1та кўпроқ ғалаба қозониш талаб этилади. Демак, режани янада оширишга тўғри келади. Шунга қарамай, қўшимча ўйин барча учун яхши имконият ҳисобланади. Оддий айтганда, футболчиларда ЖЧ финал босқичидан завқланиш учун кўпроқ вақт бўлади.
- Қолаверса, Осиёдан ЖЧ финал раундига одатдагидан кўпроқ жамоа боради. Савия мос келармикан?
- Ҳозир қитъа футболидаги вазият ҳар қачонгидан кескинроқ. Осиё кубоги ҳам жамоалар яққол кучайганини кўрсатиб берди. Озгина хотиржамлик қимматга тушиши мумкин. Аввалги ЖЧ саралашининг ҳал қилувчи босқичи 1-ўйинида Уммон термасига ютқазгандик, ўшанда рақиб қанчалик жиддий курашгани эсимда. Қисқаси, эндиликда ҳар бир ўйинда бор имкониятларни ишга солиш керак. Айни пайт Осиёнинг кўплаб терма жамоаларида хорижлик мураббийлар ишламоқдалар. Демак, тактик қарашлар ва ғоялар кўпайди. Буни ҳам инобатга олиш керак, албатта.
- Олимпиада-2024 олдидан Токио-2020 ўйинларини бирров ёдга олсак. Ҳар 4 йилликнинг бош спорт мусобақасидаги иштирок футболчи сифатида шаклланишингизга нечоғли ёрдам берди?
- Мана, ўша вақт олимпия термасида тўп сурган кўплаб йигитлар ҳозир миллий жамоанинг доимий аъзосига айланишди. Олимпиада-2020 бизга айниқса, ахлоқий жиҳатдан катта туртки берди. Испания термасини кетма-кет 2та турнир (Олимпиада-2020 ва ЖЧ-2022)да мағлубиятга учратганимиз эса ички ишончни мустаҳкамлашга хизмат қилди. Ўтмишга назар ташласак, олдинлари катта жамоаларга қарши ўйинларга қандайдир ҳадик билан қарардик. Ҳозир бундай эмас. Ҳа, Токио ўйинларида 4-ўрин билан чекланиб, медалсиз қолгандик, муҳими, Олимпиада тажрибаси энг кучли жамоалар билан тенгма-тенг ўйнайдиган даражага чиққанимизни кўрсатганди, шунингдек, қайси жиҳатларни яхшилашимиз зарурлигини ҳам.
- Мана, Япония олимпиячилари Париж-2024 йўлланмасини қўлга киритишди. Хўш, ЖЧ-2026 олдидан ҳам миллий жамоада футболчиларнинг янги тўлқинини кўришимиз мумкинми?
- Нега энди йўқ? Бош жамоамиз мураббийи Мориясу вақтида U-23 термасини ҳам бошқарган ва деярли барча йигитлар имкониятини яхши билади. Агар U-23 термаси Олимпиадада яхши иштирок этса, унда миллий жамоада рақобат янада ошиши муқаррар. Буни ўз тажрибамдан биламан. Яъни вақтида ўзимиз ҳам олимпия термасидаги яхши ўйин миллий жамоага йўл очишини теран англаган ҳолда ҳаракат қилганмиз. Пировардида янги тўлқиннинг вужудга келиши Япония футболи фойдасига ишлаши ҳам тайин.
М.ПЎЛАТОВ тайёрлади
