"Манчестер Сити" ярим ҳимоячиси Матеус Нунес яқинлашиб келаётган трансфер ойнасида сотилиши мумкин.
"Сити" ўтган ёзда португалияликни сотиб олган ва унинг учун "Вулверхэмптон"га 60 миллион евродан кўпроқ пул тўлаганди. Футболчи Пеп Гвардиола жамоасининг асосий таркибига кира олмади, шу боис клуб келаси ёзда у билан хайрлашиши мумкин. Журналист Грем Бейлининг ёзишича, "Манчестер Сити" 25 ёшли футболчи бўйича таклифларни тинглашга тайёр. Ярим ҳимоячига Саудия Арабистони чемпионати вакиллари қизиқиш билдиришган.
Матеус Нунес жорий мавсумда "Сити"нинг 29 та ўйинида қатнашиб, 5 та голли узатмани амалга оширди. Transfermarkt портали футболчининг нархини 50 миллион еврога баҳоламоқда.
