"Бунёдкор" - "Гулистон" жамоалари ўртасидаги ўйиндан кейинги матбуот анжуманида мезбонлар жамоаси мураббийларидан бири Мурод Отажонов иштирок этди.

Мурод Отажонов:
— Матбуот анжуманига кўп журналист иштирок этаётганига қараганда, ўйин яхши чиққан. Айрим ўйинлар бўладики, ундан кейин навбатчи журналистлардан бошқа ҳеч ким қолмайди.

Ўйин ҳақида тўхталадиган бўлсам, "Гулистон" 4-турга келиб ўз дарвозасидан биринчи голни ўтказиб юборди. Ўша голни биз урдик. Демак, гулистонликлар ҳам кучсиз рақиб эмас. Яхши ўйин кўрсатишгани учун йигитларга раҳмат айтаман. Бу майдонда ўйнаш ҳар иккала жамоага осон бўлмади.

— "Бунёдкор" кўп гол ура олмаганига майдон сабабчими?
— Агар вазиятлар бўлмаганида шундай дейиш мумкин эди, аммо биз 4-5 та вазиятлар яратдик, фақат улардан фойдалана олмадик. 1:0 учун ҳам, 3:0 учун ҳам 3 очко берилади. Олдимизда ОЧЛ ўйини турибди. "Бейцзинг Гуан"га қарши ўйинда яхши ўйин кўрсатишни истаймиз.

— Бугунги ўйинни "Бейцзинг Гуан"га қарши ўйин репитицияси дейиш мумкинми?
— Шунақа деса ҳам бўлади. Бугун биз бир ҳужумчи билан, икки ҳужумчи билан, 3та таянч ярим ҳимоячиси билан ва бошқа турли ўйин услубларини синаб кўрдик. 2 апрель куни стадионга келсангиз, бугунги ўйин билан ўша кунги ўйинни таққослаб кўриш имкониятига эга бўласиз.