"Металлург" бош мураббийи Рустам Мирсодиқов аввалги турда бўлиб ўтган ўйиндан тўғри хулоса чиқарилгани ва "Пахтакор"нинг ҳимояси кучсиз эканини таъкидлади.

Рустам МИРСОДИҚОВ (“Металлург” бош мураббийи):
— Барчангиз гувоҳ бўлдингиз, бугун яхши ўйин намойиш қилдик. Футбол шундай нарсаки, ҳар бир рақибга алоҳида тайёрланиш лозим. Уйдаги ўйин бор, меҳмондаги ўйин. Биз ўтган сафар ўз майдонимизда “Динамо” билан дуранг ўйнадик. Ўша кунги натижада ўзимни айбдор деб биламан. Ҳужумкор ўйин кўрсатиб, гол ура олмагандик. Бугун эса “Пахтакор” кучли клуб бўлгани учун биз қарши ҳужум тактикасини танладик. Иккинчи бўлимда бизда имконият бўлди ва ғалаба қозондик.

Футболда мағлуб бўламан деб жамоасини майдонга бошлаб тушадиган мураббий бўлмаса керак. “Пахтакор”нинг кучли томони бу ҳужуми ва ярим ҳимояси. Кучсиз томони эса ҳимояси деб биламан. Бугун биринчи гол бўлган вазиятда ҳимоячилар қоида бузишмаса ҳам бўларди. Жарима тўпидан сўнг биз гол урдик.