Суперлига чемпионатида юзага келган кичик танаффус пайтида «Нефтчи» кеча навбатдаги ўртоқлик учрашувида Қирғиз Республикаси вакили "Олой"ни қабул қилди.

Биринчи бўлимга тўхталадиган бўлсак, ўйинда ташаббусга эга бўлган вакилларимиз анча фаол ҳаракатланди ва кўпгина голли вазиятларни яратишга муваффақ бўлди. Лекин, стадионда тўпланган мухлислар биринчи  бўлимда фақат битта гол гувоҳига айландилар. 21-дақиқада ўнг қанотдан чиройли дриблинг намойиш этган легионеримиз Михай Роман қулай вазиятда бўлган Мирзоҳид Ғофуровга тўпни оширди ва футболчимиз аниқ зарба билан дарвозани ишғол этди — 1:0.

Иккинчи бўлимда мураббийларимиз катта ўзгаришларни амалга оширди ва майдонга асосан ёш футболчиларни туширишга қарор қилди. Иккинчи бўлимнинг илк дақиқасидаёқ ҳужумга ўтган вакилларимиз тезкор гол киритишди. Бу вазиятда чап қанотдан катта тезликда жарима майдончаси ичига кириб келган Ҳуршид Муҳторовнинг узатмаси Дониёр  Валиевга келиб тушди ва у осонликча иккинчи тўпни киритишга муяссар бўлди 2:0. Қолган дақиқаларда ташаббус нефтчилар томонида бўлишига қарамай, дарвозаларга бошқа тўп киритилмади.

Назорат ўйини
"Нефтчи" - "Олой" (Ош) - 2-0
Голлар: Мирзоҳид Ғофуров 21' 1:0, Дониёр Валиев 46' 2:0.