Англия терма жамоаси бош мураббийи Гарет Саутгейт 2024 йилда Германияда бўлиб ўтадиган Европа чемпионати унинг терма жамоасини йирик турнирда ғалабага олиб чиқиш учун сўнгги имконияти бўлиши мумкинлигини айтди.

53 ёшли Саутгейт Англия терма жамоасини 2016 йилдан буён бошқариб келмоқда, унинг шартномаси 2024 йилнинг 31 декабригача тузилган. Унинг қўл остида инглизлар ЖЧ-2018 ярим финали ва Евро-2020 финалига қадар етиб борган ва ЖЧ-2022 чорак финалида мусобақадан чиқиб кетган эди.

"Агар биз ғалаба қозона олмасак, эҳтимол мен бу ерда бўлмайман. Демак, бу менинг охирги имкониятим бўлиши мумкин. Менимча, терма жамоа мураббийларининг ярмига яқини турнирлардан кейин кетишади – бу халқаро футболнинг моҳияти.

Мен қарийб саккиз йилдан бери шу ердаман ва биз яқинмиз. "Илтимос, яна бир оз кўпроқ" дей олмайман. Бир нуқтада одамлар сизнинг сўзларингизга ишонишни йўқотадилар.

Агар биз катта жамоа бўлмоқчи бўлсам, мен топ-мураббий бўлишни истасам, муҳим дақиқаларда натижа кўрсатишимиз керак", - деди Саутгейт Bild нашрига берган интервьюсида.

Англия терма жамоаси Евро-2024 гуруҳ босқичида Сербия (16 июнь), Дания (20 июнь) ва Словения (25 июнь) билан ўйнайди.