Австрия терма жамоаси бош мураббийи Ральф Рангник Европа чемпионатидаги гуруҳга баҳо берди. Австрияликлар “D” гуруҳида Франция, Нидерландия ва Польша билан ўйнайди. Дастлабки учрашувда терма жамоа 17 июнь, душанба куни Францияга қарши майдонга тушади.

"Биз энг кучли рақибни турнир бошидаёқ қабул қилган бўлишимиз мумкин. Улар нафақат бу Еврода, балки икки йилдан сўнг жаҳон чемпионатида ҳам чемпионликни қўлга киритишнинг мутлақ фаворитлари. Уларда 11 нафар бошланғич ўйинчининг барчаси жароҳат олган бўлса ҳам, кейинги 11 нафари бундан ёмон бўлмайди. Демак, биринчи ўйин биз учун жиддий синов бўлади", - дея Рангникнинг сўзларини келтиради УEФА расмий сайти.