Италия терма жамоаси бош мураббийи Лучано Спалетти унинг жамоаси маълум бир футболчиларга қарам бўлмаслиги керак, деб ҳисоблайди.
"Адзуррилар" жамоаси етакчиси Николо Барелла Евро-2024 1-тури доирасида Албания терма жамоасига қарши ўйинни ўтказиб юбориши мумкин эди, аммо жароҳатини даволашга муваффақ бўлди.
Айнан “Интер”нинг 27 ёшли ярим ҳимоячисининг голи италияликларга 2:1 ҳисобида иродали ғалаба келтирди.
Ўйин якунланганидан сўнг журналистлар Спаллеттидан Италия терма жамоасининг Бареллага қарамлиги ҳақида сўрашди, мураббий бунга ғазаб билан жавоб қайтарди:
"Миллий терма жамоа ҳеч бир кишининг ёрдамига қарам бўлмай вазифани уддалай олиши керак - бизда 26 нафар кучли футболчи бор.
Менга жамоа бир кишига боғлиқ бўлиши мумкин деган фикр ёқмайди", - дея Спалеттининг сўзларидан иқтибос келтиради Football Italia.
