Словения терма жамоаси дарвозабони Ян Облак Евро-2024 гуруҳ босқичи 1-тури доирасида Дания билан 1:1 ҳисобида якунланган учрашувнинг аҳамияти ҳақида гапирди. Футболчи илк бор ўз миллий жамоаси таркибида Европа чемпионатида ўйнади.

“Бу мен учун катта аҳамиятга эга, орзум ушалди. Дания билан дурангга келсак, аввалига натижа мени қониқтирмади, ҳаммаси яхшироқ бўлиши мумкин эди, деб ўйладим. Аммо кейинроқ қайси жамоага қарши эканлигимизга эътибор қаратдим ва уни қабул қилишим осонлашди. Мени тўлиқ қониқтирадиган бир нечта нарса бор - мен ҳар доим ҳамма нарса яхшироқ бўлиши мумкин деб ўйлайман. Ҳар қандай спортчи фақат ғалаба ҳақида ўйлайди", - дея Облакнинг сўзларини келтиради AS.