«Динамо» жамоаси уй стадионида илк машғулотларини ўтказгач, клуб матбуот хизмати бош мураббий Вадим Абрамовдан интервью олди.

— Вадим Карленович, ниҳоят ўз стадионимизга қайтдик, биринчи машғулот ўтказилди. Ҳиссиётлар қандай?
— Албатта, уйимиздамиз ва майдон ҳам яхши ҳолатда, бу ёқимли. Об-ҳаво ҳам яхши, салқин. Уйда деворлар ҳам ёрдам беради, дейишади. Шунга умид қиламиз ва тайёргарлик кўряпмиз. Асосийси – мухлисларнинг стадионга келиши учун уларга ёқадиган ўйин кўрсатиш.

— Майдоннинг ҳолати қандай экан?
— Ҳаммаси яхши, майдон табиийки яхши ҳолатда, кейинчалик ўйинларга қай даража чидамлилигини вақт кўрсатади.

— Ўйинга 2 кун вақт қолди, режалар, умуман таркиб бўйича муаммолар йўқми?
— Шукурки, таркиб борасида бизда ҳаммаси яхши. Дисквалификациялар ҳам тугаган. Энди яхши ўйин намойиш этиш қолди.

— «Андижон» билан ўйинда стадионда чиройли футбол атмосфераси яратилади. Бу жамоага ҳам ёрдам берса керак?
— Албатта, бу шубҳасиз ёрдам беради. Шу боис барча самарқандлик мухлисларни бизни қўллаб-қувватлаш учун стадионга чорлаб қоламиз. Биз ҳам уларни хурсанд этишга ҳаракат қиламиз, — дейди Вадим Карленович.