«Dinamo» jamoasi uy stadionida ilk mashg‘ulotlarini o‘tkazgach, klub matbuot xizmati bosh murabbiy Vadim Abramovdan intervyu oldi.

— Vadim Karlenovich, nihoyat o‘z stadionimizga qaytdik, birinchi mashg‘ulot o‘tkazildi. Hissiyotlar qanday?
— Albatta, uyimizdamiz va maydon ham yaxshi holatda, bu yoqimli. Ob-havo ham yaxshi, salqin. Uyda devorlar ham yordam beradi, deyishadi. Shunga umid qilamiz va tayyorgarlik ko‘ryapmiz. Asosiysi – muxlislarning stadionga kelishi uchun ularga yoqadigan o‘yin ko‘rsatish.

— Maydonning holati qanday ekan?
— Hammasi yaxshi, maydon tabiiyki yaxshi holatda, keyinchalik o‘yinlarga qay daraja chidamliligini vaqt ko‘rsatadi.

— O‘yinga 2 kun vaqt qoldi, rejalar, umuman tarkib bo‘yicha muammolar yo‘qmi?
— Shukurki, tarkib borasida bizda hammasi yaxshi. Diskvalifikasiyalar ham tugagan. Endi yaxshi o‘yin namoyish etish qoldi.

— «Andijon» bilan o‘yinda stadionda chiroyli futbol atmosferasi yaratiladi. Bu jamoaga ham yordam bersa kerak?
— Albatta, bu shubhasiz yordam beradi. Shu bois barcha samarqandlik muxlislarni bizni qo‘llab-quvvatlash uchun stadionga chorlab qolamiz. Biz ham ularni xursand etishga harakat qilamiz, — deydi Vadim Karlenovich.