Англиянинг танқидларга кўмилган ўйинлари соясида гўёки Франция қолиб кетаётгандек – нима бўлсаям, инглизлар гуруҳ ғолиби бўлди, Франция эса, 2-ўринни олди. Франция ҳам, Англия ҳам 2 тадан гол урди, бунинг устига Франция голларининг бири автогол, иккинчиси пеналтидан. Унда нега Франция ҳақида жим ҳамма?

Сабаби, ўйинни кўрган пайтдаги таассурот ҳам катта аҳамиятга эга. Тўғри, Франция ҳам Дешам даврида анча прагматик, эҳтиёткор ўйин намойиш этади, аммо уларда вазиятлар яратиш тизими йўлга қўйилган, жамоа бу борада қийналмайди. Мисол учун, Франция атиги 2 гол урган бўлса-да, 3 ўйинда 5.88xg яратди, бу Евродаги энг яхши кўрсаткичлардан бири. Зарбалар сони – 48 та, яратилган ўта хавфли вазиятлар бўйича фақат Хорватиядан ортда қолиб, 2-кўрсаткичга эга, Англия 20-ўрин. Рақиб жарима майдонида тўпга тегинишлар бўйича Дешам шогирдлари Еврода энг яхши, Англия эса, 12-ўринда.

Яъни Франция қандай ўйнашни билади, шунчаки, ҳозирча, вазиятлардан фойдаланиш бўйича оқсаш кузатиляпти. Жамоа қандай услубда ўйнашидан қатъи назар, агар мунтазам равишда хавфли вазиятлар юзага келтирадиган тизим ишлаб турса, муаммо йўқ. Англияда айнан шу жиҳат оқсаяпти – Саутгейт футболчилари вазият яратишда катта қийинчиликка дуч келмоқдалар.