Angliyaning tanqidlarga ko‘milgan o‘yinlari soyasida go‘yoki Fransiya qolib ketayotgandek – nima bo‘lsayam, inglizlar guruh g‘olibi bo‘ldi, Fransiya esa, 2-o‘rinni oldi. Fransiya ham, Angliya ham 2 tadan gol urdi, buning ustiga Fransiya gollarining biri avtogol, ikkinchisi penaltidan. Unda nega Fransiya haqida jim hamma?

Sababi, o‘yinni ko‘rgan paytdagi taassurot ham katta ahamiyatga ega. To‘g‘ri, Fransiya ham Desham davrida ancha pragmatik, ehtiyotkor o‘yin namoyish etadi, ammo ularda vaziyatlar yaratish tizimi yo‘lga qo‘yilgan, jamoa bu borada qiynalmaydi. Misol uchun, Fransiya atigi 2 gol urgan bo‘lsa-da, 3 o‘yinda 5.88xg yaratdi, bu Yevrodagi eng yaxshi ko‘rsatkichlardan biri. Zarbalar soni – 48 ta, yaratilgan o‘ta xavfli vaziyatlar bo‘yicha faqat Xorvatiyadan ortda qolib, 2-ko‘rsatkichga ega, Angliya 20-o‘rin. Raqib jarima maydonida to‘pga teginishlar bo‘yicha Desham shogirdlari Yevroda eng yaxshi, Angliya esa, 12-o‘rinda.

Ya’ni Fransiya qanday o‘ynashni biladi, shunchaki, hozircha, vaziyatlardan foydalanish bo‘yicha oqsash kuzatilyapti. Jamoa qanday uslubda o‘ynashidan qat’i nazar, agar muntazam ravishda xavfli vaziyatlar yuzaga keltiradigan tizim ishlab tursa, muammo yo‘q. Angliyada aynan shu jihat oqsayapti – Sautgeyt futbolchilari vaziyat yaratishda katta qiyinchilikka duch kelmoqdalar.