Якшанба куни кечқурун Тошкентнинг “Бунёдкор” жамоаси навбатдаги учрашувни ўтказиш учун Пекинга жўнаб кетди ва душанба куни Хитой пойтахтига етиб келди.

Аввалига Миржалол Қосимов шогирдлари Тошкент-Сеул рейси бўйлаб “Korean Air” авиакомпаниясининг А-330 самолётида парвоз қилишди. Жанубий Корея пойтахтидаги маълум вақтдан сўнг “қалдирғочлар” белгиланган манзил – Пекин томон йўлда давом этишди. Ҳаво кемасидаги икки соатлик парвоз “Бунёдкор” ФК делегациясини Хитой заминига олиб келди.

Аэропортда ҳужжатлар расмийлаштирилгач, бунёдкорчилар отел томон отланишди. Тахминан 30 дақиқа автобусда юрилгач делегациямиз учун ажратилган “Yuyang Hotel” меҳмонхонасига етиб келдик. Жамоамиз аъзолари отелнинг еттинчи ва саккизинчи қаватларидаги хоналарни банд этишди.

Пекинга 18 нафар футболчи олиб келинди. Улар орасида сўнгги вақтларда жароҳати туфайли учрашувларда иштирок эта олмаган Олег Зотеев ҳам бор. Футболчиларнинг кайфияти жанговор ва барча Пекинда мазмунли ўйин кўрсатиб, керакли натижани қайд этган ҳолда гуруҳ пешқадамлигини сақлаб қолиш ҳақида ўйламоқда.

Бугун кечқурун “Бунёдкор”нинг Пекиндаги биринчи машғулоти бўлиб ўтади.

Осиё Чемпионлар лигаси гуруҳ босқичи доирасидаги “Бейцзин Гоан” клубига қарши учрашувга қуйидаги футболчилар йўл олишган: Игнатий Нестеров, Муроджон Зухуров, Анвар Ғофуров, Акмал Шораҳмедов, Хайрулла Каримов, Дилшод Жўраев, Саҳоб Жўраев, Артём Филипосян, Жавлон Иброхимов, Лутфулла Тўраев, Фозил Мусаев, Алибобо Раҳматуллаев, Жасур Ҳасанов, Олег Зотеев, Сардор Рашидов, Марко Блажич, Олександр Пишур, Камолиддин Мурзоев.

Мирзаҳаким Тўхтамирзаев,
Сеул-Пекин