«Ой мураббийи» номи учун асосий кураш «Бунёдкор» бош мураббийи Миржалол Қосимов ва «Металлург» устози Рустам Мирсодиқов ўртасида кечди. Бу пойгада жамоаси март ойида Олий Лига баҳсларида бирорта очко йўқотмаган, қўшимчасига, ўз дарвозасидан бирорта ҳам гол олиб чиқмаган, ўз навбатида, дастлабки 4-тур якунига кўра мусобақада яққол пешқадам бўлиб турган «Бунёдкор» устози омадлироқ чиқди – Қосимов Мирсодиқовни 5 очкога ортда қолдириб, март ойининг энг яхши мураббийи деб топилди.

Мирсодиқов қўл остидаги «Металлург» 3-турда «Динамо» билан ўйинда дуранг ўйнаб, очко йўқотган бўлса, «Бунёдкор» Олий Лигадан ташқари, Осиё Чемпионлар лигасида ҳам нисбатан муваффақиятли ўйин кўрсатмоқда ва мусобақа нимчорак финалига чиқиш учун қулай вазият ҳосил қилган. «Ой мураббийи» учун сўровнома кучли бешлигидан, Қосимов ва Мирсодиқовдан ташқари, «Гулистон» бош мураббийи Бахтиёр Ашурматов, «Локомотив» катта мураббийи Ҳаким Фузайлов ва «Пахтакор» устози Мурод Исмоилов жой олган.

Маълумот ўрнида, март-ноябрь ойларида ўтказиладиган Ойнинг энг яхши футболчиси ва мураббийи танловиларининг натижалари умумлаштириб чиқилади ва натижалардан келиб чиқиб, ЎзПФЛнинг 2013 йилдаги энг яхши футболчиси ва мураббийи номи аниқланади.

«Ойнинг энг яхши мураббийи» сўровномаси кучли бешлиги:
1. Миржалол Қосимов («Бунёдкор») – 36 балл.
2. Рустам Мирсодиқов («Металлург») – 31 балл.
3. Бахтиёр Ашурматов («Гулистон) – 17 балл.
4. Ҳаким Фузайлов («Локомотив») – 15 балл.
5. Мурод Исмоилов («Пахтакор») – 12 балл.