Пекиндаги учрашув якунланиши биланоқ ўйин тақдирини ҳал қилган ягона гол муаллифи Фозил Мусаевнинг фикрлари билан қизиқдик.
- Биласизми, ўша гол урган вазиятимизда барча жамоадошларим қаҳрамонларча ўйин намойиш этишди. Олег Зотеев билан биргалашиб олдинга ўтдик, у бир футболчини ўзига жалб қилиб, мени рақиб эътибордан четда қолдирди. Лутфулла Тўраев ҳужумни якунлашга ҳаракат қилди. Бироқ сўнгги зарбани бериш менга насиб қилди. Вазиятдан унумли фойдаланганимдан хурсандман. Дарвоқе, ортимда Олександр Пишур ҳам бор эди. Шу боисдан ҳам пекинликлар кўпроқ Пишурни қўриқлашга уринишди. Шундай экан киритилган гол – бутун жамоаники! Агарда бўлим охирида жарима зарбасидан оширилган пасни ҳам голга айлантирганимда бундан-да яхши бўларди. Бироқ ҳар сафар ҳам омад кулиб боқавермайди. Ғалабадан жуда хурсандмиз ва бизга далда беришган мухлисларимизга миннатдорчилик билдирамиз, - дейди Фозил Мусаев.
Ўйиндан олдинги матбуот анжуманига бош мураббий Миржалол Қосимов айнан Фозил Мусаевни олиб келганди. Ўшанда хитойлик ҳамкасбларимиз футболчимизга айтарли эътибор қаратишмаган эди. Воқеалар ривожи шундай тус олдики, эътибордан четда қолган футболчимиз рақибни жазолади. Учрашувдан кейин эса микст-худудда журналистларнинг кўплаб саволлари айнан Фозил Мусаев манзили томон қаратилди.
