Марказий ҳимоячи Хайрулла Каримов “Бейцзин Гоан” билан ўйинда катта ҳажмдаги ишни амалга оширди. Унинг ўйиндан кейинги фикрлари қуйидагича янгради.

- Ҳақиқатдан ҳам оғир бўлган баҳсни ўтказдик. Ўзингиз кўрдингизку, Фредерик Кануте қандай ўткир ва хавфли ўйин намойиш қилди. Унинг кучи ва маҳорати ҳали ҳам сақланиб қолинган. Унда якка курашларда тўпни қабул қилиш, ҳужумни жонлантириш учун шерикларига пас оширишда ортиқча ҳаракатлар кузитилгани йўқ. Рақиб футболчиларига гол уриш учун имкон бермаганимиздан хурсандман. Ҳа, битта вазият бўлди. Ўшанда ўзимиз қанотда тўпни рақибга бериб қўйдик. Ўша вазият ортда қолиши биланоқ, шерикларимга айтдим: бундай ўйинларда, айниқса ўз дарвозамиз яқинида таваккал қилиб, футболчини алдаш керак эмас. Рақиб футболчилари ҳар доим ҳам “Фейр Плей” қоидасига амал қилиб ўйнашмади. Футболчи шифокор ёрдамига муҳтожлик сезиб ётганида тўпни майдон ташқарисига чиқариб юбордик. Бироқ ўша ҳолатда рақиб аъзолари тўпни бизга қайтариб беришмасдан ҳужумга ўтиб кетишди. Бу яхшимас. Энг асосийси, ғалаба қозондик ва мухлисларимизга қувонч улашдик, - дейди Хайрулла Каримов.