“Бейцзин Гоан” клубига қарши Пекиндаги учрашувининг иккинчи бўлимида “Бунёдкор” устози ёш футболчиларни майдонга туширди.

Мухлис ва мутахассислар аста-секинлик билан кузатиб боришяптики, Миржалол Қосимов ёш футболчиларга имконият бериб уларни эртанги кунга тайёрлаб бормоқда. Мана айнан “ишчилар” стадионида “Бейцзин Гоан”га қарши кечган ўта масъулиятли баҳсда тажрибали шерикларини Алибобо Раҳматуллаев, Сардор Рашидов ва Дилшод Жўраев каби футболчилар алмаштиришди. Осиё Чемпионлар лигаси учрашувида ёш футболчиларнинг майдонга туширилиши уларнинг кейинги баҳсларга тажрибалари ошиб боришини таъминлайди. Таъкидлаш лозимки, ёш футболчилар бош мураббий ишончини оқлаб, учрашувда яхши таассурот қолдиришди. Энди ушбу баҳс уларнинг хотирасида узоқ вақт сақланиб қолади.

- Жамоамизнинг ҳар бир уй учрашувига оилам аъзолари ташриф буюришади. Отам меҳмондаги ўйинларимни ҳам диққат билан ойнаи жаҳон орқали кузатиб боради. Оилам аъзолари менинг энг биринчи экспертларим! Кўпроқ майдонда бўлиб, мухлисларимизни хурсанд қилишни истайман. Бунинг учун албатта машғулотлар жараёнида тер тўкиб, асосий жамоага муносиб бўлишим керак, - Алибобо Раҳматуллаев.

- Бу Осиё Чемпионлар лигасидаги биринчи учрашувим эмас. Миржалол Қўшоқович менга ўтган йилги мусобақада ҳам имконият берганди. Мураббийлар ва мухлислар ишончини оқлашга ҳаракат қиламан, - Дилшод Жўраев.

- Муҳим ғалабага эришилган баҳсда иштирок этганимдан хурсандман. Жамоамиздаги тажрибали футболчилар ҳар доим учрашув вазиятларида қандай ўйнаш кераклигини айтиб туришади. Бу эса айнан мен каби ёшларга катта тажриба ҳисобланади, - Сардор Рашидов.