37 ёшли Лионель Месси Колумбияга қарши Америка кубоги финалида “Альбиселесте” сафида асосий таркибда майдонга тушди, аммо жароҳати туфайли 66 дақиқа ўйнаб, алмаштирилди. Футболчи майдонни тарк этгач, йиғлаб юборди. Мессисиз аргентиналиклар қўшимча дақиқаларда Лаутаро Мартинеснинг голи эвазига минимал ғалабага эришди.
“Турнир якунланди ва барчага хабарлар ва табриклар учун раҳмат айтмоқчиман. Худога шукур, аҳволим яхши, умид қиламанки, тез орада майдонга қайтиб, ўзим ёқтирган иш билан шуғулланаман. Мен жуда хурсандман, чунки биз мақсадимизга эришдик - Америка кубогини қўлга киритдик. Биз нафақат жамоамиз, балки бир оиламиз. Жамоамизнинг бугуни ва келажаги ажойиб”, — деб ёзди Месси ижтимоий тармоқларда.
