"Интер" ва "Ювентус" "Женоа" ҳужумчиси Альберт Гудмундсон билан шартнома имзолашдан манфаатдор.
Исландиялик футболчи А Сериянинг ўтган мавсумида 35 та ўйинда 14 та гол уриб, бешинчи тўпурарга айланди. 27 ёшли футболчининг юқори даражали клубга ўтиши мумкинлиги ҳақида узоқ вақтдан бери гап-сўзлар бор ва бугунги кунда унга асосий даъвогарлар "Интер" ва "Ювентус" ҳисобланади, деб хабар беради Жанлука ди Марцио. Иккала клуб ҳам ўзларининг ҳозирги ҳужумкор футболчиларидан бири билан хайрлашганида музокараларни бошлаши мумкин.
Манбанинг таъкидлашича, Альберт Гудмундсон "Женоа"дан 8-10 миллион евро эвазига ижарага олиниб, кейинчалик 15 миллион еврога сотиб олиниши мумкин.
