"Челси" бош мураббийи Энцо Мареска ярим ҳимоячи Энцо Фернандеснинг қайтишини жамоадошлари яхши кутиб олишига ишонмоқда.

Эслатиб ўтамиз, Фернандес июль ойи бошида Аргентина терма жамоаси билан Америка Кубогидаги ғалабани нишонлаш чоғида Инстаграмда трансляция йўлга қўйиб, Франция терма жамоаси футболчилари ҳақида ирқчилик руҳидаги қўшиқ куйлаганида “Челси”даги кўплаб жамоадошларининг ғазабига учраган эди.

"Футболчи баёнот берди, узр сўради ва клуб ҳам шундай қилди. Менимча, бу ерда ҳеч нарса қўшиб бўлмайди, вазият аллақачон аниқ.

Тўғрисини айтсам, унинг жамоага қайтишида ҳеч қандай муаммо бўлмайди, деб ўйлайман. Охир оқибат, биз ҳаммамиз инсонмиз ва менимча, ҳеч биримизнинг ниятимиз ёмон эмас.

У ёмон одамга айлангани йўқ. Менимча, бу ерда мутлақо муаммо йўқ. Мен Энцо билан гаплашдим, уларнинг кўплари билан гаплашдим. Футболчи баёнот берди ва узр сўради, ҳаммасига ойдинлик киритилди", - деди Мареска Daily Mail билан суҳбатда.