Кейинги пайтда Наманган вилоятининг чекка ҳудудларида ҳам миллионлар ўйинига катта эътибор қаратиб келинмоқда.
Тўрақўрғон тумани Куймазор қишлоғида 39-мактаб директори Аъзамжон Ҳомидов ташаббуси билан Тўрақўрғон туманидаги 33-сонли БЎСМ билан ҳамкорликдa футбол тўгараги ташкил этилди.
1 мартдан ўз фаолиятини бошлаган мазкур тўгаракда 1999-2006 йилда туғилган (2-7 синф ёки, 7-14 ёш) болалар ва ўсмирлар мураббий Ибрагимов Муроджон ва Обидов Одилжон қўл остида ҳар куни 2 маҳалдан машғулот олиб боришмоқда. Бу эса ёш спортчиларни мактабда тушликгача ва тушликдан кейин ўқишини ҳисобга олиб мувофиқлаштирилган.
"Бизнинг қишлоқда спортга бўлган қизиқиш анча юқори. Келажакда Куймазорни истеъдодлар маконига айлантирмоқчимиз. Балки, бу ер келажакда Наманганнинг бош жамоаси "Навбаҳор"нинг асосий базасига айланиб қолар. Бунинг учун ёшларга қўлимиздан келган барча имкониятларни яратиб берамиз", - дейди 39- мактаб директори Аъзамжон Ҳомидов.
Маъмуржон ҲАМИДОВ
