"Атлетико" клуби "Манчестер Сити" ҳужумчиси Хулиан Альваресга қандай шартнома таклиф қилаётгани маълум бўлди.
Topskills Sports UK нашри хабарига кўра, агар трансфер амалга оширилса, 24 ёшли аргентиналик футболчи йилига 12-15 миллион евро ишлаб олади. Манбага кўра, шартнома беш йилга мўлжалланган.
Қайд этилишича, муаммо Альваресни сотишдан тахминан 70-94 миллион евро ишлаб олмоқчи бўлган "Манчестер Сити"нинг молиявий талабларининг юқорилигида. Аввалроқ, "Манчестер Сити" бош мураббийи Пеп Гвардиола аргентиналик футболчининг кетишини истисно этмаганди.
Ўтган мавсумда Альварес барча мусобақаларда 54 та ўйинда майдонга тушиб, 19 та гол урди ва 13 та голга ассистентлик қилди.
