"Ливерпуль" бош мураббийи Арне Слот "мерсисайдликлар" клубининг бозордаги пассивлигидан хавотирда эмаслигини айтди. Нидерландиялик мутахассиснинг фикрича, у бор эътиборини жамоани 2024/2025 йилги мавсумга тайёрлашга қаратган.
"Бу клубда иш бошлаганимда асосий вазифам жамоани янги мавсумга тайёрлаш эди. "Ливерпуль" спорт директори трансферлар устида ишламоқда, у мени янгиликлардан бохабар қилиб туради, лекин менинг барча эътиборим шу ерда ва ҳозир бор футболчиларга қаратилган", - деди Слот Liverpool Echo билан суҳбатда.
45 ёшли Арне Слот мавсум оралиғида "Ливерпуль"ни қабул қилиб олди. Мутахассис 2021 йилнинг ёзидан буён "Фейеноорд" бош мураббийи лавозимида ишлаб келаётганди. Бу даврда унинг қўл остида "Фейеноорд" барча турнирларда 145 учрашувда иштирок этиб, 94 марта ғалаба қозонган, 27 марта дуранг ўйнаган ва 24 марта мағлубиятга учраган.
