Конор Галлахер "Атлетико Мадрид" билан трансфер муаммолари туфайли Лондонга қайтди.
"Челси" ярим ҳимоячиси Трево Чалоба ва Ромелу Лукаку билан бирга клубнинг ёшлар жамоасида машғулотларни давом эттириши кутилмоқда.
Аввалроқ "Атлетико" англиялик ярим ҳимоячини 34 миллион фунтга сотиб олиши хабар қилинганди, аммо "Челси" билан келишув ҳалигача ёпилмаган. Саму Омородионнинг трансфери муваффақиятсизликка учрагач, клублар келишувга Жоау Феликсни қўшиш имкониятларини муҳокама қила бошлади.
Тиббий кўрикдан ўтган ва трансфер эълонини кутаётган Галлахер сўнгги беш кунни Мадриддаги меҳмонхоналардан бирида мустақил машғулотларда ўтказди.
Ёз бошида англиялик «Челси»нинг янги шартнома бўйича таклифини рад этди, шунингдек, «Астон Вилла»га ўтишни ҳам рад этди. Энди у "Атлетико" билан шартноманинг янгиланишини ёки бошқа клублардан таклифларни кутиши керак.
