Осиё чемпионлар лигасининг 5-туридан ўрин олган «Пахтакор» ва «Ал-Иттифоқ» жамоалари учрашуви олдидан меҳмонлар устози Мурод Исмоилов ўз фикрларини билдириб ўтди.

«Даммам шаҳрига кеча етиб келган бўлсакда, ўйинга тайёргарликни эса аллақачон бошлаганмиз ва бу ерда кеча биринчи машғулотни ўтказдик. Эртага ишончли ва чиройли ўйин намойиш қилиб, ғалаба қозонишга ҳаракат қиламиз».

«Майдонда кескин кураш боришига шубҳа йўқ. Беллашувнинг қизиқарли ўтиши тайин. Чунки ҳар икки жамоада кейинги босқичга чиқиш учун имконият сақланиб қолган».

«Тошкентда биз яхши ўйин намойиш этмагандик. Бунга эса ўша баҳснинг мавсумдаги илк расмий учрашув экани сабаб бўлганди. Миллий чемпионат ва Чемпионлар лигасидаги бошқа ўйинларда футболчилар жисмоний, тактик ва техник қобилиятларини ошириб боришмоқда. Шу сабабли эртанги баҳсда бизда бу борада муаммо бўлмайди».

«Лахвия» билан ўйинларда анча яхши ўйнадик, бироқ кичик хатолар эвазига рақибни мағлубиятга учрата олмадик. Биз эртага чиройли футбол намойиш этишга интиламиз. Мухлислар билан тўлган стадионда ўйнаган маъқулроқ. Биз эса саудиялик ишқибозлар чиройли футболдан баҳраманд бўлишига имкон қадар интиламиз».

«Футболда ҳар бир жамоа ҳамиша ютишга интилади. Мақсадимиз чиройли футбол кўрсатиб, зафар қучиш. Лекин нима бўлишини олдиндан ҳеч ким билмайди. Бутун тайёргарлигимиз эртанги баҳсга қаратилган. Ёш футболчилар ўсиб боришса ва уларга тўғри йўналиш кўрсата олсак, шунинг ўзи катта муваффақият. Эртага ғалаба учун тўп тепамиз. Ўз ўрнида мағлубиятни фожеа билан тенглаштирмаган бўлардим».