Пойтахтимизда мамлакатимиз мустақиллигининг 33-йиллиги муносабати билан гандбол бўйича эркаклар ва аёллар жамоалари ўртасида “Мустақиллик кубоги” халқаро турнири якунланди.
Ўзбекистон Республикаси Спорт вазирлиги ва Ўзбекистон гандбол федерациясининг 2024-йил учун мўлжалланган календарь режасига асосан ташкил этилган мазкур мусобақада Ўзбекистон, Қозоғистон ва Сингапур давлатларининг 6 та эркаклар ва 5 та аёллар жамоалари ғолиблик учун беллашди.
Эркаклар биринчилигида Тошкент вилоятининг “ОКМК” гандбол клуби шоҳсупанинг “олтин” поғонасига кўтарилди.
Кумуш медални пойтахтнинг “Тошкент” жамоаси эгаллаган бўлса, бронза медалига Қозоғистоннинг “Alatau champions” GK клуби эга чиқди.
Қизлар ўртасида эса KGU “Qaysar” (Қозоғистон) вакиллари зафар қучди. Ўзбекистон терма жамоаси иккинчи, “ОКМК” жамоаси гандболчилари учинчи ўринни эгаллашди.
