Poytaxtimizda mamlakatimiz mustaqilligining 33-yilligi munosabati bilan gandbol bo‘yicha erkaklar va ayollar jamoalari o‘rtasida “Mustaqillik kubogi” xalqaro turniri yakunlandi.
O‘zbekiston Respublikasi Sport vazirligi va O‘zbekiston gandbol federasiyasining 2024-yil uchun mo‘ljallangan kalendar rejasiga asosan tashkil etilgan mazkur musobaqada O‘zbekiston, Qozog‘iston va Singapur davlatlarining 6 ta erkaklar va 5 ta ayollar jamoalari g‘oliblik uchun bellashdi.
Erkaklar birinchiligida Toshkent viloyatining “OKMK” gandbol klubi shohsupaning “oltin” pog‘onasiga ko‘tarildi.
Kumush medalni poytaxtning “Toshkent” jamoasi egallagan bo‘lsa, bronza medaliga Qozog‘istonning “Alatau champions” GK klubi ega chiqdi.
Qizlar o‘rtasida esa KGU “Qaysar” (Qozog‘iston) vakillari zafar quchdi. O‘zbekiston terma jamoasi ikkinchi, “OKMK” jamoasi gandbolchilari uchinchi o‘rinni egallashdi.
