Суперлигада 17-тур якунланди. Турнинг сўнгги баҳсида ОКМК жамоаси "Бунёдкор" меҳмони бўлди ва минимал ҳисобда ғалаба қозонди. Беллашувдан сўнг жамоа бош мураббийи Миржалол Қосимов матбуот анжуманида иштирок этди.

Қийин ўйин бўлди. Шунга қарамай, 3 очко билан кичик таътилга чиқдик. Учрашув давомида икки жамоа ҳам эҳтиёткорликка эътибор қилди. Рақиб ҳавфли зонада эканлиги боис ортиқча таваккал қилмади. Биз стандартдан киритган голимиз эвазига ғалаба қозондик. Очко учун хурсандман, аммо ўйиндан қониқмадим. Фурсатдан фойдаланиб, "Бунёдкор"га омад тилайман. Қуйи ўринларни тезроқ тарк этсин.

80-дақиқадан кейинги активлик учун маҳсус кўрсатмалар берасизми?

Ҳеч қандай маҳсус кўрсатма йўқ. Доим футбол биринчи ўринда бўлиши керак. 80-дақиқадан кейин эмас, бошидан охиргача бир хил темп, балансда ҳаракат қилиш керак. Самарқандда бошида гол киритиб, ўйинни бериб юбордик. Кейин иккинчи голни киритгандан кейин яна чекиндик, аммо руҳан ҳимояландик. Ҳисоб тенглашгач, яна олдинга ўтдик, бироқ рақиб бизни жазолади. Аслида, киритилган голдан сўнг, олдинга боришда давом этиб ғалабани мухрлаш керак. Футбол кечирмайди. 80-дақиқадан кейин ҳеч қандай алоҳида кўрсатма йўқ, шунчаки бошидан токи охиригача яхши ўйин кўрсатиш керак.

Суперлигада жамоалар даражаси тенглашгани сабаби нима? Ҳамма ўсдими ё бирданига пасайдими?

Ҳар ҳил ёндашиш мумкин. Ҳар бир баҳс осон кечмаяпти. Ўткинчи беллашув йўқ. Жадвал ҳеч нарсани англатмайдиган учрашувлар бўлмаяпти. Қаршилик бор бўлса, демак ўсиш бор.

"Бунёдкорнинг ҳозирги холати ҳақида фикрингиз қандай?

Бунёдкорнинг ўрнида исталган клуб бўлиб қолиши мумкин. Жамоа ёмон эмас. Ташқаридан нимадир дейиш қийин. Илёсга ҳам вазиятдан чиқиб кетасизлар деб омад тиладим.