Президент Шавкат Мирзиёев Париждаги Паралимпия ўйинларида ғалаба қозониб, терма жамоа ҳисобидаги олтин медаллар сонини бештага етказган енгил атлетикачилар Элбек Султонов, Ёрқинбек Одилов ва таэквондочи Асадбек Тоштемиров билан телефон орқали суҳбатлашди.
Давлат раҳбари ўз номидан ва барча юртдошлар номидан спортчиларни самимий қутлаб, бу зафарлар Мустақиллик кунига муносиб совға бўлганини таъкидлади. Паралимпиячилар муросасиз беллашувларда кўрсатаётган юксак маҳорат ва метин ирода бутун халқ, айниқса ёшларни руҳлантираётгани қайд этилди.
Президент йигитларнинг мураббийлари ва ота-онасига миннатдорлик билдириб, совриндор бўлган спортчиларга ҳам салом ва табрик сўзларини йўллади.
Чемпионлар ҳар бир чиқишда давлат раҳбари ва халқ қўлловини ҳис этганларини таъкидлаб, мамлакатда паралимпия ҳаракати ривожига қаратилаётган эътибор ва яратилган шароитлар учун раҳмат айтди.
