Халқаро шахмат федерацияси (FIDE) 2013-2014 йилларда аёллар ўртасида ўтказиладиган FIDE Гран-Присида иштирок этадиган 19 нафар спортчининг номи ҳамда мусобақаларни қайси шаҳарларда ўтишини эълон қилди.

Низомга кўра ҳар бир иштирокчи 6 босқичдан 4 тасида қатнашиш имкониятига эга. Гран-При мусобақасининг олти босқичи якунларига кўра энг яхши натижага эришган шахматчи, Анна Ушенина – Хоу Ифань учрашуви ғолиби билан куч синашади.

Эътиборлиси, дунёнинг етакчи гроссмейстерлари ўртасида ўтказиладиган мазкур мусобақаларда Ўзбекистонлик халқаро гроссмейстер Нафиса Мўминова ҳам ғолиблик учун дона суради. Нафиса, Гран-При турниридаги иштирокини 2013 йилнинг 17 сентябрь – 1 октябрь кунлари Тошкентда ўтказиладиган учинчи босқичидан бошлайди. Шундан сўнг, Нафиса Мўминова  Россиянинг Ханти-Мансийск (2-16.05.2014 й.), Грузиянинг Тбилиси (18.06-2.07.2014 й.) ва монголиянинг Эрденет (24.08-7.09.2014 й.) шаҳарларида бўлиб ўтадиган навбатдаги босқич мусобақаларида баҳс юритади.

Биринчи ва иккинчи босқич мусобақалари эса Женева (Швейцария) ва Дилижон (Арманистон) шаҳарларида ўтказилади.

Қуйида Гран-При турнирининг саралаш босқичида иштирок этадиган 19 нафар спортчилар берилган:
Нафиса Мўминова (Ўзбекистон, 2312), Юфан Хоу (Хитой, 2617), Хумпи Конеру (Ҳиндистон, 2597), Анна Музичук (Словения, 2585), Хуе Зао (Хитой, 2565), Нана Дзагнидзе (Грузия, 2554), Катерина Лагно (Украина, 2547), Надежда Касинцева (Россия, 2531), Антоанета Стефанова (Болгария, 2530), Виктория Смулит (Латвия, 2514), Харика Дронавалли (Ҳиндистон, 2510), Венжун Ю (Хитой, 2505), Бела Хотенашвили (Украина, 2499), Александра Костенюк (Россия, 2495), Анна Ушенина (Украина, 2477), Элина Данелян (Арманистон, 2466), Ольга Гиря (Россия, 2440), Тувшинтугс Батчимег (Муғилистон, 2295), Татьяна Касинцева (Россия, 2517).