Якшанба куни соат 21:00да “Бунёдкор” ФК делегацияси Тошкент халқаро аэропортидан Жанубий Корея томон йўлга чиқди ва делегацияси душанба куни эрта тонгда корейслар юртига етиб борди.

Сеул аэропортидаги бир соатлик кутишдан сўнг, Пусан шаҳрига парвоз давом эттирилди. У ердан эса автобусларда белгиланган манзил – Поханг томон йўлга чиқилди.

Поханг “қалдирғочлар”ни енгил ёмғир билан кутиб олди. Шаҳар гўзаллигига кўрк қўшиб турган чиройли гуллар Похангдаги илк таассуротларимизни илиқ бўлишини таъминлади.

“Бунёдкор” ФК делегацияси “POSCO” ҳалқаро маркази меҳмонхонасининг тўртинчи қаватига жойлашди.

Таркибда жиддий йўқотишлар бўлишига қарамасдан, футболчиларнинг кайфиятлари жанговор. Ҳамма фақат ва фақат ижобий натижани кўзлаб, гуруҳ пешқадамлигини сўнгги турда ҳам сақлаб қолиш ҳақида ўйламоқда. Марказий ҳимоячи Хайрулла Каримовнинг сариқ карточкалари сони иккитага етганлиги боис баҳсда иштирок эта олмаса, икки таянч ярим ҳимоячилари – Фозил Мусаев ва Жавлон Иброҳимов, шунингдек чап қанот ҳимоячиси Саҳоб Жўраев жароҳатлари боис  Тошкентда қолишди. Миржалол Қосимов эрталабки тетиклик мамлакатига 17 нафар футболчини олиб келди.

Эслатиб ўтамиз, “Поханг Стилерз” – “Бунёдкор” учрашуви 30 апрель куни Тошкент вақти билан соат 15:00да старт олади.

Мирзаҳаким Тўхтамирзаев
Сеул-Поханг